غصون
غصون ومالت مع الهوى
والشجر شايل جدايل وجدايل
جديله خضرا بزهرة بيضا
وجديله نازله تودي جواب
ونجمه وقمرة وسما وسحاب
وورقه طايره حايره على غصن حاضن عش احباب
وحرفين وسهم راشق فى قلب قلب
غصون ومالت حبت ودابت
سندت راسي على جزعها وسألتها
ياغصون يا دايبه م الغرام ايه سر هواكي
انتي كمان الهوى رماكي
ميلت علي بحنيه ورقها لمس ايدي بصت ف عينيا
وقالت
لحظه جنون
لحظه جنون فك النسيم الجدايل وداعب الغصون
انكسفت والزهر الابيض بقى الوان... وعناقيد الدهب احمر مرجان
يا غصون يا حاسه باللي جوايا
انا هواكي وانتي هنايا
اميل معاكي وتميلي معايا
لأ حاسبي ده الهوى مالوش امان .. خوان
لو ما كنش يميلك يكسرك وتبقي رحتي ف خبر كان
مر زماااان
وف يوم الغدر فيه كااان محتوم
غضبان الهوى بيزوووم ويزوووم
وبرق ورعد ومطر وغيوم
ارتعشت الغصون واصفر الورق م الخوف
يا سلام .. بسرعه كده جت ايام الخريف
نام الليل والصبح صحي لقاها بتلملم ورقها وتلوم على يوم امنت فيه للهوى
ما انا قلتلك يا غصن الورد حاسب م اللي ما لوش دواء
غصون ومالت مع الهوى
تمت
همسه
Falling hearts Here
هناك 32 تعليقًا:
"غصون ومالت مع الهوى"
وهل للغصون من مفر الا ان تميل مع الهوى؟!
كالعادة.. تميز و ابداع
.....تحياتي........
ارتعشت الغصون واصفر الورق م الخوف
يا سلام .. بسرعه كده جت ايام الخريف
---------------
حلوة اوى الهمسة دى ...
ايوة كدة...اسلوبك بداء يتظبط...
ربنا معاكى يارب
وحشتينا يا همسة
وحشنا كلامك ورقته
كلمات عذبة ورقيقة
وصور شعرية مختلفة بين الربيع والخريف
لكنها رائعة حقا
وربنا يجعل ايامك كلها ربيع
وتسلم ايديكى يا همسة
تحياتى وتقديرى لاحلى همسة
الهدهد الطائر
صديقي الطائر
كالمعتاد بتوصل للمغزى بسهوله
وده هو السوال الغصون ومالت مع الهوى طب والبنت تميل ولا لا ؟ وهل لها اختيار ؟
الحوار بين البنت والغصون فيه الاجابه
اشكرك على التعليق وماتطيرش بعيد
اختك همسه
ELGaZaLy
صديقي
كل ده بسبب توجيهاتك مع اني مش متخيله اني اكتب بعض الابيات من غير قافيه بس طلعت تجربه لذيذه مستغرباها بس جديده
اشكرك على دعاءك وعلى سوالك وعلى تعليقك يا صديقى
همسه
همس الاحباب
اخي خالد ابو همس الجميله
مش انا اللي وحشتكم انتو اللي وحشتوني كان بيوصلنى دعاكم وسوالكم واهتمامكم ووفاءكم هو لسه فيه كده ؟ كنت فاكرة الناس دي خلصت من زمان
ميرسي جدا يا خالد وربنا ما يحرمنيش من تعليقاتك الجميله
همسه
صباحك عسل
:)
انت تهت شويه مع النص ده
اللهجه خليجية مطعمة بشوية مصري
بس على فكره الكلام حلو اوي
والمعاني عميقه ورقيقه
الزين صاحبتي الجميله من الخليج
صباحك زي الفل
وحشتيني
ميرسي على تعليقك الرقيق وانتى اللي حلوة قوي
همسه
واللهى ما عارف اقول ايه بس بجد كلامك حلو اوى
كويس ان لسه فيه شاعريه لغايه دالوقتى انا افتكرتها ماتت
واللهى الامل لسه موجود
تحياتى
ابو علي
ازيك يا ابو علي
ماهو انت لو كنت شفت الكرمه (تكعيبه العنب )اللي انا شفتها كنت لازم تقول احلى كلام
ميرسي جدا على تعليقك الجميل
همسه
بتقولي إن أحلى همسة هى أول همسة
لكن الهمسة دي تفوقت عليها بصور جميلة من الكلمات
تسلم ايدك بجد
اخي المهاجر
الف مليون حمد الله على السلامه
نورت المدونه وصاحبه المدونه
حقيقي مش بحس اني كتبت الا لما اخي المهاجر يقولي رأيه
متغيبش تاني من فضلك وكفايه سفر البلد دي احسن من غيرها
همسه
الله عليكى كلمات اكثر من رائعة
دعوة للامل
نورتيني يا قمرايه والله عليكي انتي وعلى مدونتك الرقيقه
همسه
صبح العندليب :)
( سندت راسي على جزعها وسألتها
ياغصون يا دايبه م الغرام ايه سر هواكي )
ايه الكلام الجميل ده حسستينى انى بسمع اغنية لعبد الحليم
بجد مش مجاملة
مودتى و احترامى
عاليا حليم
يا قمرايه انتي
بجد انتي قلتي تعليق كبير قوي علي
انا مش عارفه ارد عليه بس كل اللي اقدر اقوله ان حد زيك يشرفني قوي قوي انه يزورني ويقول بس اني كويسه
ميرسي يا عاليا
همسه
اختى العزيزة الرقيقة
ايه اخبارك
بصراحة مفتقدك ومفتقد جديدك
معلش لو كنت مقصر معاكى شوية بس غصب عنى والله
يا رب تكونى بخير وسعادة
اتمنى انك تطمنينا علىيكى
دمتى بخير
خالد
همس الاحباب
اخي الجميل خالد
ربنا ما يحرمني من سؤالك انا عارفه انك بجد مشغول ربنا يكرمك ويسعدك يارب
وكفايه انك وسط الزحمه دي بتسأل على اصحابك وتودهم
انا الحمد لله بخير
اشكرك مرة تانيه وسلملي على همس وحنين
القمرين
همسه
ايه الجمال ده
كلامك زى الشهد بجد
تسلم ايديكى
تقبلى مرورى
سلام
حنين القلب
اهلا اهلا بالقمر انتي اللي شهد مكرر
نورتيني يا حنين
ومبسوطه بيكي صديقه جديده قريبه
همسه
الله على همساتك واحساسك وروعه أدائك وأسلوبك المرادى توحفه جدا مشاء الله على فكره مدونتك مش عارف اقولك ايه عليها جميله موت
احلى همسه
فينك ياقمر مش باينه ليه
كلماتك كل يوم تزداد قوه ونضج
ومش ناويه تنزلى اسكندريه ولا ايه
دمتى بكل الحب صديقتى
أين الهمسات؟.. عله خير ان شاء الله.
.....تحياتي....
وحرفين وسهم راشق فى قلب قلب
-----------
تحفه
جبتي الجمله دي منين يابنتي؟؟؟؟؟؟؟؟؟
اصلا الفكره كلها عبقريه بجد
عارفه .. فكرتيني باغنية شجرة فلفل تتجوز من شجرة توت .. بتاعة علي الحجار
لو ماتعرفيهاش لازم تسمعيها .. هي في اخر البوم ليه
بس بجد بجد .. تصويرك ومعايشتك للموقف ككل خلتني احس اني شايفه حته حته
سلاموووووووووز
آتشوقنا للجديد
أيضاً طال الغياب يا همسة
عل المانع خير
ادم المصري
صديقي الجميل
اقول ايه طيب ؟ بعد الكلام الجميل ده مش هقدر اقول غير ان بجد احساسك ورايك وتعليقك اسعدوني قوي قوي قوي
ومستنيه رايك انشاء الله في الجديد
همسه
dina seliman
صاحبتي وحبيبه قلبي
انا فعلا كنت في اسكندريه ولسه راجعه الحمد لله
مممممممم بفكر اروح تاني اصل الدنيا هناك حاجه تانيه يا بختك يا صاحبتي
همسه
الهدهد الطائر
صديقي العزيز جدا
انا بخير الحمد لله بس بجد اسفه اني ما قولتش اني مسافرة وبجد كنت حاسه ان فيه حاجه كبيره ناقصاني
انا كويسه يا صديقى ويسلملي سؤالك عليا
همسه
soooo
اهلا اهلا اهلا انت كنت فين نورت المدونه
وبعدين ايه الكلام الكبير ده بقى انا ده كله ؟ امال سبت ايه لعلي الحجار
انا جبت الجمله دي يا سيدي من قلب قلبي
اما اغنيه الحجار فانا فعلا بقالي كتير مسمعتلوش حاجه بس حنزل الالبوم انشاء الله واسمعه كله
اما بقى انا فرحانه جدا جدا ان الكلام حسسك انك شايف المشهد وفكرني بتعليق صديقي العزيز محمد سرور لما قاللي انه حس برائحه الورد
والله العظيم انتم بتقولو كلام جميل احلى 10000000 م اللي بكتبه
سلامووووووز
همسه
عاليا حليم
يا قمرايه
انشاء الله الجديد قريب قوي حيكون جاهز
وحستنى رايك الجميل
همسه
اخي المهاجر
اخي الغالي
انا بخير الحمد لله بس كنت في اسكندريه كام يوم
ورجعتلكم علشان ازهقكم تاني
اختك
همسه
إرسال تعليق