فرحت وعيني دمعت
بتضحكي ليه يا عين والدمع على رمشك
فرحانه طب منين إمسحي إمسحي دمعك
مش فاكرة السنين دي ياما قطعت شرايين القلب والحب عليكي حرمت
لما كانت بتقسى علي وف ضلوعي كسرت
الضلع ده مرة .. والضلع ده ولعت
داست وداست وداست لحد ما خلصت ع اللي فاضل فيا ...عليا شطبت
فرحت وعيني دمعت
لو كنتي نسيتي قلبي كنتي فرحتي من غير دموع
بس اعمل ايه ف قلبي.. يا قلبي على طول موجوع
في كل خطوة حفرة وانت غاوي وقوع
جواك حنين جواك انين م البكا معصور مخنوق مخلوع
واجيب الامان منين والحزن ده شروع
في قتل روح بتجري ورا حق مشروع
حقها في الحياه ولا ممنوع ؟
فرحت وعيني دمعت
دمعه نزلت قطرة ندى
بتفوق وتروق وتاخدني وتشرق على شط بحر احلام متزوق بيلمع بيبرق
انزل فيه ولا اخاف اغرق
وتيجي يا موجه تشيليني تعليني وتخليني
أشوف حبيبي بعيني واسمع نداه
فرحت وعيني دمعت
بتدمعي ليه يا عين والدنيا بتصالحك
اضحكي بقى ووريني فين غمازتك
حبي الحياه حبيني دانا كنت بناغشك
تمت
همسه
Falling hearts Here
هناك 16 تعليقًا:
شوفتِ يا همسة ..
برضه أول تعليق
ناغشي الحياه واضحكِ وافرحي
صدقيني دي دنيا فانية
عيشي أيامكِ .. لأن الحياة كلها لسه قدامكِ
حلوة قوي الهمسه دي لكن ليه بين السطور في شجن مستخبي ؟؟
اخي المهاجر
يارب دايما اول تشجيع واول تعليق
مش عارفه ازاي بتقرا بين السطور على العموم المرة الجايه مش حسيب مسافات بين كل سطر وسطر
همسه
اول مره ازورك بس بجد كلامك جميل ومشاعر رقيقه وموهوبه حقيقى..منتظرين المزيد..عندك حق اوقا كتير بنخاف نفرح اوى خوفا من اثر الم او قلب موجوع بين الضلوع بيسرق مننا فرحتنا ..للاماام ومنتظره زيارتك
الشموع السوداء
مين قال سوداء دي شموع بيضاء
شرفتني زيارتك
وشرفني رايك
وجايالك مدونتك حالا
همسه
تحياتي
تعرفي احنا شعب البكاء مكتوب عليه، نزعل نبكي...نفرح نبكي...و نقول اثناء الضحك خير اللهم اجعله خير...
لماذا؟ لا أدري...يمكن يكون موضوع شيق
للدراسة.
كلماتك مؤثرة و مشاعر فياضة و صراع
نفسي بين الحياة و الحزن في داخلك...
و السطور تخفي بين طياتها مشاعر انسانه نبيلة.
يا ريت تتركي نفسك لله...بمعني ان امس مضي
و لن يعود...و اليوم نسأل الله ان يكون
يوما سعيدا مبروكا...اما الغد فمن يعلم ما سيأتي به الينا الا الله...ندعوا الله ان يكون خير من سابقه.
تحياتي و تقديري.
بتدمعي ليه يا عين والدنيا بتصالحك
اضحكي بقى ووريني فين غمازتك
حبي الحياه حبيني دانا كنت بناغشك
ياحلى همسه
بجد كلماتك ما اجملها
دمتى بخير صديقتى
انا بس جاية اسلم عليكى واشكرك على زيارتى
وعلشان اكتب تعليق عن الموضوع لازم اقرا المدونة كلها
وهاقرأها لانها رائعة
تحياتى واحترامى
كاميليا
الكلام جميل جميل كالعاده يا همسه
واسمحيلي اقولك يا همسه بدون القاب
احساسك مرهف ومليان شجن وحزن
بس فيه نقد.... واحنا اتفقنا ننقد صح!!!؟
* فرحت وعيني دمعت>>>> يعني فرحتك من جوه بس الفرحه اتكسرت على حزن مدفون ترجمته دمعه خايفه ياريتك كنت قلتي ليه الفرحه اتكسرت وليه قلبك مهما فرح حزين
* لما الفرح برضه يوجع وده اللي حسيته من كلامك يبقى اللي فرحنا غير اللي بكانا وفي الحاله دي اللي مبكيك هو اللي صعب ( يتبع)
تابع..........
ولما هو صعب كده ترجعي في الاخر تقولي انك بتاغشي بس دي يا ستي من وجه نظري كسرت خط الشجن الجميل
اصل الشجن برضه جميل
عموما طولت عليكي بس ارجو تتقبلي رايي لان بجد كلامك واحسساسك راقي وربنا يديمك
زيارة اولي للهمسة السادسة
هاقرا الهمسات اللي فاتتني
تحياتي
صديقي الربان
لو انا كلامي جميل يبقى انت حضرتك يعني كلامك ايه؟
كلامك فيه تشجيع وامل في الله عز وجل
ميرسي بجد على زيارتك بس انا من دلوقتي مش حعتبرها زياره حعتبرها ميناء حتعدي عليها وانت رايح جاي
همسه
دينا القمرايه
انا بجد حبيتك جداااااا وبجد شرفتني كلمه صديقتي وحسيت فعلا اننا صحاب
متحرمنيش ابدا من زيارتك ومن صداقتك
همسه صديقتك
الاستاذه كاميليا
زيارتي لمدونتك شرف لي لاني لقيت فعلا حد بيكتب بجد واحاسيسه عاليه بجد وكنت لسه بتكلم عنك وجايبه في سيرتك وبقول هو فيه حد لسه بيكتب كده
مستنيه رايك ونقدك بس بالراحه علي انا مش قدك
همسه
الناقد اللازع خايف من الحقيقه
اكيد نقدك بناء وحيفدني جدا وقول اللي في نفسك دايما وانا متقبله كل اللي تنقدني فيه
احساس جميل ان فيه حد ينقدك معنى كده انك استفزيت فيه شيء ما
ولو تسمحلي ارد على نقدك على قد ما فهمته
اولا انا قصدت تكون التجربه عامه بمعنى ان كل انسان يقرا الكلمات دي يحس انها بتعبرعنه هو بس يعني لو كنت حددت تجربه معينه بعينها ما كانتش حتوصل لكل واحد بيقراها ويحس ان دي تجربته
يتبع
ثانيا
انت نقدت وقلت الرد في نفس اللحظه زي ماتكون فاهم بالظبط انا عايزة اعمل ايه
وهو اني فعلا كنت عايزة اكسر خط الشجن بكلمه كلها تناقض مفاجىء وغريب في نفس الوقت
وده يؤدي بينا لحاله الكسر من غير تدرج وهو ده المطلوب
ارجو يكون ردي فيه اجابه مرضيه
وبشكرك جدا جدا جدا وحستناك تاني
همسه من غير القاب
الزائر الجديد سندباد
هي فعلا زياره اولى واتمنى انها متكونش الاخيرة
مستنيه زيارتك الثانيه ورايك كمان
همسه
إرسال تعليق