بنوته
يا شقيه يا عفريته جننتيني يا بنوته
ممكن تكملي اكلك طب خدي بسكوته
يا بنتي مش كده سيبيها محطوطه
دي فازة غاليه و..اخ ..مبسوطه
يا شقيه يا عفريته جننتيني يا بنوته
ممكن تكملي اكلك طب خدي بسكوته
يلا نحل الواجب واحكيلك حدوته
يابنتي روحتي فين انتي يا سفروته ؟
لا صورة تيته لا دي عزيزه علي و.. اخ .. مبسوطه
يا شقيه يا عفريته جننتيني يابنوته
انا حكلم بابا واحكيله يا كتكوته
وهاقوله يوديني النادي انا والقطه الصغنتوته
تحبي تيجي معانا ؟
طب كملي اكلك او خدي بسكوته
يا شقيه يا عفريته جننتيني يا بنوته
يابنتي روحتي فين انتي يا سفروته؟
الستارة؟ حلوة عارفه دي... ايه شيكولاته؟
على الستارة الجديده كده بكل بساطه
اعمل فيكي ايه يا عكروته ؟
بتضحكي طب خلاص اضحكي عقبال ما اشوفك عروسه وازغرتلك زغروته
يا شقيه يا عفريته جننتيني يا بنوته
دي حاجه بسيطه من اللي بيحصل مع ابنه اخي لما تشرفني بالزيارة
متهيالي لو عندي بنت مش حاحبها كده
همسه
هناك 18 تعليقًا:
طب والله انا حبيت بنت اخوكي من كلامك عنها بس
ربنا يباركلكم فيها ويباركلها فيكم يارب
وتكون بنت باره باهلها وبابوها وبامها وبعمتهم كمان
ملحوظه
انتي لما ربنا يكرمك وتخلفي .. هتحبي بنتك وولادك اكتر من حبك لبنت اخوكي
سلاموووووووووووووز
سوووو
ميرسي على اول تعليق على بنوته
ربنا يتقبل منك دعاءك لينا وليك مثله انشاء الله
هي فعلا بنوته تتحب واخواتها كمان ههههه بس هي اكتر
ملحوظه
متهيالي اني لما ربنا يكرمني واتجوز واخلف مش حاحب بنتي قدها دي اول فرحه واول ضحكه واول همسه
همسه
" متهيالي اني لما ربنا يكرمني واتجوز واخلف مش حاحب بنتي قدها دي"
شوفي يا همسة
حبك لنفسك ولأهلك ولأصحابك ولجيرانك وللناس وللدنيا كلها .. في كفة
وحبك لأبنك أو بنتك .. في كفة تانية، وهى اللي تكسب
إن شاء الله ربنا يكرمك وافتكري كلامي ده
هتكون همسة عمرك ، وفرحة حياتك كلها
تحياتي
حبيبتى احلى الهمسات
يا شقيه يا عفريته جننتيني يا بنوته
انتى اللى جننتينى يقمر
ايه كلام جميل ده
لو مش عايزه تاخد البسكوته يستى اخدها انا
ولا تزعلى نفسك
ولازلت اتابع همساتك صديقتى الحبيبه
اخي المهاجر
دايما زيارتك بتشرفني وتشجعني
بس برده لالالالالالالالالا انا مصممه
بحبها وبموت فيها اكتر من بنتي او ابني
اللي في علم الغيب
والايام بيننا يا اخي المهاجر هههههه
همسه
دينا قمرايه اسكندريه
كنت لسه عندك بقرا كلنا انسان تعبير صادق وجميل ومفيد
وبعدين يا ستي خديها مش مشكله بس هي ايه البنوته ولا البسكوته هههههه
مستنياكي تاني يا صاحبتي
همسه
همسة
همساتك عجبتنى
تحياتي
مكسرات
مدونتك هايله تدل على شخصيه مثقفه وواعيه والصور اللي بتختارها معبره جدا في التصميم واختيار الالوان
ميرسي على الزياره والتعليق والحمد لله انها عجبتك
همسه
علشان خاطر القمر مفيش نقد
علشان خاطر البنوته الصغنتوته
بس بجد عسل وهايله
استمرررررررررررررررري
خايف من الحقيقه
ميرسي بالنيابه عن البنوته الصغنتوته
همسه
ربنا يخليهالك وتجيبى بنوتة حلوة شقية زيها...تحياتى
جنه
اول زيارة ليكي نورتيني
ميرسي على دعواتك وليكي زيها انشاء الله
همسه
ازيك.. اسعدنى انى مريت علشان اشوف الجمال ده
بنت أخوكى دى باين عليها قمر وكمان عفريته لكن بجد تعبيراتك جميله ( عكروته وسفروته وغيرها )
اتمنى ربنا يوفقها ونشوفها عروسه.. بس لازم دعوه لعبد الله الغلبان.
تحيــــــــاتى
المصـــــــــرى
مدونه جميله
اول زياره بس ان شاء الله اكررها تانى
الزائر الجديد عبد الله المصري
ازيك انت
ميرسي على زوقك وعلى كلماتك الرقيقه يارب تفرح كده بكل اطفال العائله
همسه
صديقي الجديد حسام يحي
اول زيارة بس اتمنى متكونش اخر زيارة والا هاجي انا مدونتك بنفسي واعزمك
همسه
انا اصبحت من عشاق همساتيك
بحبها
انت كنت فين ؟
حمد الله على السلامه
وميرسي على التعليق الرقيق
ده كتيير جدا علي
همسه
إرسال تعليق