رمضان كريم ... الله أكرم

كل عام وانتم وجميع الامه الاسلاميه بخير
همسه

الوجه الاخر للقمر

يا وجه القمر

انظر اليك فأغمض عيني

اراك احد اخر اعشقه .. في مكان اخر اعشق السفر اليه .. في زمان اخر اعشق العيش فيه ..

افتح عيني ..

فأراك احد اخر لا اعرفه .. في مكان اخر ليس لي .. في زمان اخر لا انتمي اليه ..

يا وجه القمرعندما انظر فقط اليك

اشعر بك تدنو مني يلمس وجنتي ضوئك .. تزينني بسلا سله الفضيه .. ارتدي اجنحه النجوم .. اطير عاليا ادور وادور صاعده انا اليك اقترب واقترب امدد لك يدي فلا اجد الا سراب !!!

بعيد انت عني ارى ابتسامتك واسمعك تهمس لي

قميرتي ... لست عنكي بعيد انا منك جدا قريب انت عني تبتعدين الى اين ترحلين ؟ الى مدينه بلا قمر ؟ اين هي ؟ وكيف وانت امامها تمرين ام ضوئك عنها ستحجبين ؟

يا وجه القمر لا اعشق الرحيل ...

بل مكتوب هو علي ....

من منا يحب العذاب ؟!!!

لقد جاء الركب وعلي الذهاب سأسافر الى الوجه الاخر من القمر لعلي اجدك هناك ...احد اخر في مكان اخر في زمان اخرانتمي اليه..

تمت

همسه

غصون

غصون

غصون ومالت مع الهوى

والشجر شايل جدايل وجدايل

جديله خضرا بزهرة بيضا

وجديله نازله تودي جواب

ونجمه وقمرة وسما وسحاب

وورقه طايره حايره على غصن حاضن عش احباب

وحرفين وسهم راشق فى قلب قلب

غصون ومالت حبت ودابت

سندت راسي على جزعها وسألتها

ياغصون يا دايبه م الغرام ايه سر هواكي

انتي كمان الهوى رماكي

ميلت علي بحنيه ورقها لمس ايدي بصت ف عينيا

وقالت

لحظه جنون

لحظه جنون فك النسيم الجدايل وداعب الغصون

انكسفت والزهر الابيض بقى الوان... وعناقيد الدهب احمر مرجان

يا غصون يا حاسه باللي جوايا

انا هواكي وانتي هنايا

اميل معاكي وتميلي معايا

لأ حاسبي ده الهوى مالوش امان .. خوان

لو ما كنش يميلك يكسرك وتبقي رحتي ف خبر كان

مر زماااان

وف يوم الغدر فيه كااان محتوم

غضبان الهوى بيزوووم ويزوووم

وبرق ورعد ومطر وغيوم

ارتعشت الغصون واصفر الورق م الخوف

يا سلام .. بسرعه كده جت ايام الخريف

نام الليل والصبح صحي لقاها بتلملم ورقها وتلوم على يوم امنت فيه للهوى

ما انا قلتلك يا غصن الورد حاسب م اللي ما لوش دواء

غصون ومالت مع الهوى

تمت

همسه

الهمسه الرابعه عشر : مدونتي الجديده " قصه قصيره بقلم ... همسه "

اصدقائي الاعزاء :

بدأت الان في نشر أول قصه قصيرة في مدونتي الجديده " قصه قصيرة بقلم ...همسه "

القصه باسم "عدت ولم أجدك "

http://hamssah.blogspot.com/

ارجو ان تنول رضاكم ..

صديقتكم

همسه

الهمسه الثالثه عشر : حفل الفنان عمر خيرت في ساقيه الصاوي

حفل الفنان صاحب الانامل الذهبيه عمر خيرت

يقام الحفل في ساقيه الصاوي يوم السبت

الموافق 30/5/2008

همسه

الهمسه الثانيه عشرة : فاضل مين ؟

فاضل مين ؟

على فين رايحيين ؟

تاني.... ماشيين ؟

سايبيني أبكي سنين وسنين وسنين

بيقولوا وعد وانكتب على جبيني الفراق والبين

والعلامة نجمه في السما ...لأ في عيوني

من وقت للتاني تظهر وتبان

تلمع وتنزل على خدي كل فين وفين

ما هي الدموع لما تكون غاليه على العين

تصعب عليها .. من كتر حرقتها .. تحاول برموشها تمسكها ..بس على مين

لازم تفلت ...تجري.. تحرق ..وتكوي ..وتعلم ع القلب المسكين

ولأمتى حعيش علشان أفارق وبس أفارق ؟

و أستنى بكرة الدور على مين ؟

مش عارفه يا قلبي مين ضاع من مين ؟

ولا عمري هو اللي اتسرق حسرة وشوق وحنين ؟

نفسي في يوم انا اللي فيه افارق النغم الحزين

ولا يا ترى حفارق مين ؟

هو فاضل مين؟

تمت

همسه

الهمسه الحاديه عشر : لكي ساركع

لكي سأركع

قالها لي وعيناه كعيون التماسيح تدمع

ابهذا يرضيني وغروري يشبع

وبهذا اكتفي واقنع

اهذا لحبه عندي يشفع

كلامه المعسول لي لا يجدي ...لا ينفع

كيف وانا من نظراته فقط افزع

لا اشعر به

ارى بداخله شيئا غامضا اجهله

يسلبني احساسي بالامان ...يخنقه

لا لا يكفيني حبه لي

ولكن كان يكفيني حبي له

الى الله اتضرع

ان يعفو عنه وحبي من قلبه ينزع

فهو حبيبا اضناه صدي ومن هجري يتجرع الالم والحرمان ومما يزيد من عذابه ذلك الامل الذي لا ينقطع

صنع مني في خياله الهه للجمال..... تمثال من شمع

عينيها الجميله عليه لا تدمع وهو مسكين لا يعلم انها لاتراه ولا لأي من نداءاته تسمع

تمت

همسه

الهمسه العاشرة : بمناسبه يوم اليتيم يتيم وعنده أم

اصدقائي
وحبايب قلبي بجد وحشتوني قوي قوي قوي
ميرسي جدا على سؤالكم واهتمامكم وكمان ميرسي لاصحابي اللي بعتولي على الميل الخاص وكل حد سأل علي انا بشكره جدا جدا جدا
من قلبي وكمان ما كنتش عارفه اني غاليه عندكم كده زي ما نتم غاليين عندي يظهر فعلا اني مش حقدر ابعد عنكم ابدا
نيجي بقى للجد
بمناسبه يوم اليتيم اللي كاااااان اول جمعه من الشهر ده
حبيت اقولكم راي المتواضع وهو ان مش كل يتيم فاقد لابويه او احدهما وانما اليتيم هو فاقد الحنان والاهتمام اليتيم هو ضحيه العنف النفسي والجسدي وحاجات تانيه كتيير تؤدي لليتم من غير فقدان للاهل
الصورة الجايه دي انا شفتها واثرت في جدا حبيت انقلها لكم صورة حيه لليتم

يتيم وعنده أم

أم بتضرب ابنها ... عادي ...حقها

وقع على الارض ...سابته ...بتربيه ...احنا مالنا .....ابنها

سحلته ....!خرشمته....! دمه سال ....لأ بقى مش كده

جريت عليه حبيت امنعها بصيت في وشها...لقيت لها مخالب وانياب بتسنها

عايزه تاكله صاحي وتقضي بنفسها على نفسها ...فلذه كبدها!!

الرحمه يا أم ده انت مصدرها ومنين لها

الرحمه وعمرها ما عرفت عنها غير اسمها

يتيم وعنده أم

بايديها تعذبه وجالها قلب

ده لو كان حجر وشاف عنيه كانت الرحمه فيه تدب

قال ..ليه يا أم قسوة القلب ده اللي مربي كلب بيعطف عليه ويطبطب

ولا انتي مش عايزاني ..؟طب.

ليه م الاول جبتيني ..؟أدوق المر والغلب أشربه شرب

نفسي أضحك..معاكي ..وأفرح والعب

والله انا خايف في يوم من الايام بين ايديكي اطب

ساكت من كتر الضرب

يتيم وعنده أم

ساب البيت وعلى اقرب ملجأ وراح

قاللهم ... ماليش حد ....عندكم مكان فيه ارتاح ...يمكن يمكن تلتئم الجراح

يوم والتاني وحن !!!!! غريب أمره الولد !!!!ايه اتجن!!!حد لجهنم بيحن!!!!ولا صحيح يا ناس الدم بيحن!!!!

يا حرام عيان وسخن م الهلوسه قال الحقيني يا أم

كلموها وقالت في ثانيه عندكوا حكون

نسي واترمى في حضنها وبعدين ...

افتكر اللي منها كان وكان

خاف وجري وقف بعيد زي ما كان لأ لأ يا أم مش عايز منك أحضان

ده انا كنت بدور ع الامان في حضنك اللي دمي عليه هان

وفضل على ده الحال زي المجنون بقايا انسان... ساعه بيضحك وساعه خايف مقهور زعلان بيئن.... الفرح عليه بيضن

بكت وبكت وقالت انا السبب سامحني يا ابني مكنتش في يوم اظن يجي علي الزمان وامدلك ايدي علشان علي تمن وتيجي في حضني تكن وأكن

يتيم وعنده أم

شوفي بعنيكي يا أم اهو هو ده الحزن قدامك متجسد

على هيئه شبح لطفل ...عبرة .. ودليل حي على الظلم اتوجد

قد ايه صعبان علي الولد

من غير ذنب اتجلد

بكرباج الغل والحقد والعند

فاتورة وهو اللي بيدفع الثمن ما بيدفعش بداله حد

مد لي ايدك يا ابني مد انا جنبك حاحميك في حضني من المد والبرد اللي في حيلك بيهد

هي ابواب الرحمه عمرها في وشك تتسد

دي مش كل أم تقدر في ضناها تعض

هي دي حكايه طفل في الدنيا دي اتولد .....يتيم وعنده أم

تمت

همسه

الهمسه التاسعه : معايده و عاشقان الجزء الثاني (كنا عاشقان)

اصدقائي :
وحشتوني جدا
اولا : كل عام وانت بخير بمناسبه المولد النبوي الشريف اعاده الله علينا بالخير انشاء الله
وبالمناسبه دي ادعوكم لحفظ بعض ايات القرأن الكريم ولنبدا بجزء عامه وافضل موقع وجدته يسهل الحفظ عن تجربه لاني الحمد لله بدات معاه
هو موقع الشيخ محمد جبريل وهو يمثل نفس طريقه الكتاب بتاع زماااان فهو يقرا السورة ايه ايه مع ترك مساحه لك للترديد خلفه كالكتاب واللينك اهه
http://www.jebril.com/ar/holy_quran/kottab_online.htm
وانصح بعد سماع السورة لاول مرة سماع التفسير ثم الحفظ
وافضل من قدم لنا خواطره عن القرأن الكريم من وجهه نظري المتواضعه هو الشيخ الشعراوي رحمه الله عليه
ستجدوا فيه تفسير جزء عامه كاملا وبعض السور الكبيرة واللينك اهه
http://www.elsharawy.com/
وادعو للجميع بعلم ينفع وقلب يخشع وعين تدمع من خشيه الله
اهو نعمل حاجه لأخرتنا شكلنا ...
ثانيا :
كل سنه وامي وكل امهات الدنيا بخير انشاء الله يارب وامثالي كمان من امهات المستقبل اللذيذات الجميلات الخ.. الخ..
ثالثا :
فاكرين العاشقان ؟ دبت بينهم خنااقه انما ايه تحفه وكانت حتتطور للاقسام والمحاضر ومش عارفه يظهر انهم اتجوزوا ولا ايه السبب مش عارفه المهم انا حنقل لكم الخناقه بالتفصيل الغير ممل

كنا عاشقان

انا وانت

اهذا هو العشق الذي به حلمت

لا لست انت الذي تمنيت ان ارنو بقربك ما حييت

وقلبي ؟ أمت ؟ أين هو بعد ما مزقت

بسكين الغدرودمي استحللت وأهدرت

كنا عاشقان

أنتي اللتي أمتيني بأصفاد من حرير كبلتيني

مليكتي لم تفهميني لمتيني وبختيني بالغدر والخيانه اتهمتيني أنتي حتى لا تسمعيني

أم كان هو الفقر ؟ أهو عيبا ؟

حسنا أمهليني

وقتا لكي أسعدك

الأن ؟

تطلبين ما لا أملك

حبيبتي هل نسيتيني أنا مملوكا في مدينه هواك لست الملك

أم أنا وقعت في شرك

من خيوط عنكبوتيه نسج

أدور وأدور مع غيري من أسراك حولك في فلك

وأصدرت حكمك لن أستطيع الرحيل أو أترك مجرتك الا اذا حبك بي فتك

أو أكون في معبدك ناسك

هو الهلاك أو الهلاك اذا

مبتغاك ومقصدك

كنا عاشقان

انا وانت

الأن مني مللت

أين هي الأماني والوعود ؟ مولاي هل علي كذبت ؟

لقد جف نبع الهوى الذي منه استلهمت معنى لحياتي التي سلبت

حتى اسمي نسيت

أين مملكه الحب ؟ احتلت ؟

أم سقط تاج الملك مني سهوا ؟ قل لي لمن أعطيت ؟

لامرأه غيري على قلبك ملكت

لا أدري من أين جئت بهذه القسوة واستطعت ان تتركني وبخطى مسرعه نحوها هرولت

ركضت لهثت

بكل شيء فيها انبهرت ولأسلحتها الفتاكه سلمت

أمرك وعمرك وفي طاعه عمياء استمثلت

صبرا حبيبي صبرا لقد استعجلت

لست فارسها لن تأمن لك بعد ما بعت الذهب .. والثرى اشتريت

اتركني حسنا لا أبالي اذهب الى حيث اتيت

فقلبي معي ومن داء هواك شفيت

نعم كنت عاشقه والان كرهت

و... عفوا ... حبيبي أفضل الصمت

فأنا لن انسى دوما اننا كنا عاشقان

انا وانت

تمت

همسه

الهمسه الثامنه : عاشقان

عاشقان

عصف هواك بفؤادي واجتزه من بين اضلع

وهوى به امام قدميك على مرأى منك ومسمع

من الصخركان .. والان أمام عينيك يخضع

بعد سنوات العناد ..عاشقا متلوع

لم يكن بيده او بيدي ان امنع

ما قدره الهوى وشرع

فرفقا به ...حبيبي رفقا لا تصرع

عاشقان

لا يا حبيبتي لا تخشيني

انت مليكه قلبي ..انت ضياء عيني

فاحذري علي ... لا تحذريني

أسيرك وملك يمينك مقيدا بأغلال الهوى لا تحرريني

صريعك انا ... ارحميني

عاشقان..

انا وانت ...

مولاي وعمري وعشقي طالما بك حلمت

اه ...كم احببتك وبنار هواك اكتويت

مغمضه عيناي في دربك مشيت

نهر الغرام منقوشا في راحتيك وجدت

يجري عذبا نقيا ملأت كفي شربت وارتويت

وتسألني انا الرحمه ...كيف؟

وقد ملكت أمري شئت هذا أم ابيت

عاشقان ...انا وانت

تمت

همسه

الهمسه السابعه : بنوته

بنوته

يا شقيه يا عفريته جننتيني يا بنوته

ممكن تكملي اكلك طب خدي بسكوته

يا بنتي مش كده سيبيها محطوطه

دي فازة غاليه و..اخ ..مبسوطه

يا شقيه يا عفريته جننتيني يا بنوته

ممكن تكملي اكلك طب خدي بسكوته

يلا نحل الواجب واحكيلك حدوته

يابنتي روحتي فين انتي يا سفروته ؟

لا صورة تيته لا دي عزيزه علي و.. اخ .. مبسوطه

يا شقيه يا عفريته جننتيني يابنوته

انا حكلم بابا واحكيله يا كتكوته

وهاقوله يوديني النادي انا والقطه الصغنتوته

تحبي تيجي معانا ؟

طب كملي اكلك او خدي بسكوته

يا شقيه يا عفريته جننتيني يا بنوته

يابنتي روحتي فين انتي يا سفروته؟

الستارة؟ حلوة عارفه دي... ايه شيكولاته؟

على الستارة الجديده كده بكل بساطه

اعمل فيكي ايه يا عكروته ؟

بتضحكي طب خلاص اضحكي عقبال ما اشوفك عروسه وازغرتلك زغروته

يا شقيه يا عفريته جننتيني يا بنوته

دي حاجه بسيطه من اللي بيحصل مع ابنه اخي لما تشرفني بالزيارة

متهيالي لو عندي بنت مش حاحبها كده

همسه

الهمسه السادسه : فرحت وعيني دمعت

فرحت وعيني دمعت

بتضحكي ليه يا عين والدمع على رمشك

فرحانه طب منين إمسحي إمسحي دمعك

مش فاكرة السنين دي ياما قطعت شرايين القلب والحب عليكي حرمت

لما كانت بتقسى علي وف ضلوعي كسرت

الضلع ده مرة .. والضلع ده ولعت

داست وداست وداست لحد ما خلصت ع اللي فاضل فيا ...عليا شطبت

فرحت وعيني دمعت

لو كنتي نسيتي قلبي كنتي فرحتي من غير دموع

بس اعمل ايه ف قلبي.. يا قلبي على طول موجوع

في كل خطوة حفرة وانت غاوي وقوع

جواك حنين جواك انين م البكا معصور مخنوق مخلوع

واجيب الامان منين والحزن ده شروع

في قتل روح بتجري ورا حق مشروع

حقها في الحياه ولا ممنوع ؟

فرحت وعيني دمعت

دمعه نزلت قطرة ندى

بتفوق وتروق وتاخدني وتشرق على شط بحر احلام متزوق بيلمع بيبرق

انزل فيه ولا اخاف اغرق

وتيجي يا موجه تشيليني تعليني وتخليني

أشوف حبيبي بعيني واسمع نداه

فرحت وعيني دمعت

بتدمعي ليه يا عين والدنيا بتصالحك

اضحكي بقى ووريني فين غمازتك

حبي الحياه حبيني دانا كنت بناغشك

تمت

همسه

الهمسه الخامسه غزل

بنت حلوة اسمها غزل

كانت بتقول الحب ده شال عشاني اتغزل

راسي في السما ورجلي ..ع الارض ثابته عمرها ماتزل

شافت القمر عجبها سناه ندهتله بعنيها وعلشانها نزل

لفوق لفوق خدها معاه ..خافت وقالت ده سحر

ضحك وقال متخافيش مني ده اللي بيني وبينك عهد لايمكن ينحل

بنت حلوة اسمها غزل

كانت بتقول الدنيا دي بتاعتي انا

انا الشمس انا الدفا النجوم ...انا

قامت الدنيا وباديها شاورت وقالت ...كفايه لحد هنا

الهنا مش ليكي يا غزل ..الهنا ده ملكي انا

وروها نجوم الضهر ...

ده انا الدنيا زي ما اعلي بعرف كمان ازل

بنت حلوة اسمها غزل

قبل الاوان دبلت واترمى عليها الشبك

من ايد لايد يا ورده .. ما حد يرحمك

حرام عليكي يا دنيا ده الحزن بيها اتشبك

كفايه عليها كده .ايه .هو ذل

بنت حلوة اسمها غزل

بنت حلوة ...غزل ده اسمها

كانت بتحلم بس ...والدنيا اديتلها

اتغزلت فيها ...يا بختها ....

تمت

همسه

الهمسه الرابعه انا كمان بحب اسكندريه في الشتا

انا كمان بحب اسكندريه في الشتا

اعزائي ...
كنت اتصفح عده مدونات واستوقفتني مدونه للاسف لم استطع ان احفظ اللينك ولكنها كانت تعبير صادق من فنانه اعتقد تدعى نوار وكانت تتحدث فيها عن تجربه فتاه تستقل قطارا لتذهب به الى المنتزه في الاسكندريه لتشاهد زوجان على الشاطىء او حبيبان ثم تعود ادراجها الى مدينتها في نفس اليوم .
كتبت لها في تعليقي على المدونه ..انا كمان بحب اسكندريه في الشتا..
لماذا كل هذا الحب لهذه المدينه الساحره ما الذي يجذبني اليها بهذه القوة من اللذي يناديني من هناك كل شتاء عندما تهطل الامطار ويشتد الطقس بروده ابحث عن سبب يدفعني دفعا الى هناك ولا تستكين روحي الا اذا لبت هذا النداء...
كل ما اذكره عندما كنت طفله صغيرة نائمه بالكرسي الخلفي لسيارة ابي -رحمه الله -استيقظت فجاه على دقات حبات المطر على نافذتي وجدت جاكيت ابي ملقى على جسدي وهو مليء بعطره المميز الجميل نظرت عبر النافذه ووجدت الامطار كالانهار على النافذه يمري من خلالها اضواء خافته ملونه جميله وفجأه توقف ابي لشراء بعض الاحتياجات وعندما احسست انه ابتعد سارعت وارتديت هذا الجاكيت وفتحت باب السيارة قفزت بالخارج تحت الامطاروظللت أدور وأادوروأدور في حلقات وانا في منتهى السعاده واغني اغنيه قديمه لمطرب نوبي -رحمه الله -اعتقد كانت كلماتها تقول (الدنيا برد وعم خليل بيسقي الورد ...خدو مني ورده اوراقها شارده ...) هههههههه شيء من هذا الفبيل
تنبهت فوجدت ابي يضحك ويقول لي :ادخلى بقى احسن تاخدي برد زي عم خليل
قفزت داخل السيارة بسرعه متسائله :هو عمو خليل عيان يا بابا انا عايزة اشوفه
ظل يضحك ويضحك وانا ايضا ضحكت وفهمت انه كان يمازحني خلعت الجاكيت واختبأت داخله وعدت اسند رأسي على النافذه كم كانت رائحته جميله هذا الجاكيت وكم كنت اشعر بالسعاده .بالحنان. بالامان. بالدفء ...
سآتي اليك يا ابي كم اشتاق اليك ...الان علمت لماذا اشتاق اليكي يا اسكندريه اشتاق الى القرب من ابي الى روح ابي وعطره ودفئه هنااااااااااااااااااااااااك تحت المطر في الشتاء بالاسكندريه
تمت
انتظروني مع همسه غزل
الى لقاء
همسه

توضيح : اخيرا لقيت اللينك

شرفتني الفنانه اللتي تحدثت عنها في اول مقالي بالزياره واخيرا لقيت اللينك مع توضيح بسيط اسم الفنانه رباب والمدونه جسر الى الحياه

واللينك لمن يرغب بزيارتها وقراءه كلماتها بنفسه

http://www.blogger.com/profile/00531084638704519789

همسه

الهمسه الثالثه همسه جنه الجزء الثاني والاخير

همسه جنه الجزء الثاني والاخير:

ولازالت اختها تجري في اتجاه النار كالفراشات و مازالت جنه تجري لاهثه خلفها وكلما لاح لها املا من بعيد جرت خلفه تاركه وراءها جنتها ولكن بلا فائده

لم تستطع جنه ان تجد اختها ولم تستطع ايضا ان تعود لجنتها لسبب واحد فقط وهو انه

لا توجد جنه على الارض

اعزائي :عذرا ... همسه جنه الجزء الثاني والاخير يتم نقلها الان لمدونتي الجديده المخصصه للقصه القصيرة .

همسه

همسه جنه الجزء الاول

الهمسه الثانيه :

(همسه جنه)

عذرا ... همسه جنه الجزء الاول يتم نقلها الان لمدونتي الجديده المخصصه للقصه القصيرة

همسه

اول همسه

اعزائي ..

هذه اولى همساتي ....

لقد مللت الصراخ وصيحات الاستنكار والغضب وقررت ان اعود كما كنت نعم كما كنت اهمس بما اريد ولا اسمح للصوت النشاز من ان يعبر من اذني الى قلبي وعقلي

وفي همستي الاولى اليكم احاول ان احدد اطار لمدونتي وقد حاولت كثيرا ان اجعل لها اطارا محددا ولكن في النهايه وبعد محاولات عده قررت ان اترك كل همسه تعبر عن حالتها وعن نفسها بطريقتها فاما ان تكون همسه حب او همسه فرح او حزن او ..او ...

في صورة جمله او زجل او شعر او قصه قصيرة او كلمه واحده المهم انها تعبر عما اريد او ما يريد الاخرون ان اسمعه ولكن ارجوكم بالهمس

في النهايه هي همسه .. همسه صادقه من القلب الى القلب
همسه حب . . .
رايت فتاة تبكي اقتربت منها وسالتها لماذا تبكين نظرت الي في تعجب وقالت الا تعلمين لقد مات الحب في قلوب المحبين